जनकपुर टुडे

२०८२ कार्तिक १५, शनिबार १८:४३

नेकपा माओवादी केन्द्रले छिटो भन्दा छिटो नेकपा एकीकृत समाजवादी लगाएतका दलसंग एकता गर्ने निर्णय गरेको छ ।

शनिबार शनिबार पार्टी कार्यालय पेरिसडाडामा बसेको माओवादी महाधिवेशन आयोजन समिति सचिवालय बैठकले पार्टी एकताका लागि सैद्धान्तिक र नीतिगत विषय टुंगो लागेको भन्दै छिटो एकता गर्ने निर्णय भएको प्रवक्ता अग्निप्रसाद सापकोटाले जानकारी दिनुभयो ।

उहाले एकताका लागि प्राविधिक तथा संगठानिक बिषयमा छलफल भएको भन्दै कार्तिक १७ गते बस्ने केन्द्रीय बैठकले एकताको अन्तिम निर्णय गर्ने बताउनुभयो ।

सापकोटाले एकीकृत समाजवादी, महेन्द्रराय यादवको जसपा, एमालेबाट विद्रोह गरेका प्रेमबहादुर सिंह, राजु कार्कीको नेकपा समाजवादी, सुवास काफ्लेको जनसमाजवादी पार्टीकाबीचमा एकता हुने बताउनुभयो । त्यस्तै बिप्लव नेकपाबाट बिद्रोह गरेका शक्तिसंग पनि पार्टी एकताका लागि कुराकानी भइरहेको उहाले बताउनुभयो । उहाले तत्काल पार्टी एकता नभए फागुन २१ गतेको चुनाव नहुन पनि सक्ने भएकाले एकताका लागि ढिला नगर्ने जिकिर गर्नुभयो ।

उहाले नेकपा एकीकृत समाजवादी र विप्लव नेतृत्वको नेकपालाई पनि सिंगै एकतामा ल्याउने प्रयास गरेको बताउनुभयो । एकताको विषयलाई लिएर पार्टी विभाजन नहुने उहाले बताउनुभयो ।